UKA 2001/23
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaatut siunnersuummut nassuiaatit
Nassuiaatit nalinginnaasut
Peqqussutissatut siunnersuut manna kommunalbestyrelsip aalajangiinerata Isumaginninnermi Naammagittaalliuuteqartarfimmut naammagittaalliuutigineqarsinnaaneranik erseqqissaataasumik imaqarpoq, taamaalilluni nalornissutaasariaarutissalluni kommunalbestyrelsi sinnerlugu politikkikkut imaluunniit allaffissornikkut aalajangiisoqarsimappat Isumaginninnermi Naammagittaalliuuteqartarfimmut naammagittaalliortoqarsinnaasoq.
Taamatuttaaq aalajangersakkamik nutaamik ilanngussisoqarpoq, tamatumani Naalakkersuisut kommunini ataatsimiititalianik sulianik isumaginninnermut tunngasunik suliaqartartunik pikkorissartitsisarnissaannik periarfissiisumik. Tamanna pivoq ataatsimiititaliat aalajangiisarnerminni tunngavissaannik nukittorsaaviginiarlugit.
Isumaginninnermi Naammagittaalliuuteqartarfimmi suliassanik suliarinnittarnerup agguaqatigiisillugu sivisussusaa sivikillisarniarlugu suliassaq Isumaginninnermi Naammagittaalliuuteqartarfimmut saqqummiutinngikkaluarlugu siulittaasup aalajangiisinnaaneranik siunnersuummi periarfissinneqarpoq.
Taamatuttaaq suliassat allakkatigut suliarineqarsinnaanerat periarfissinneqarpoq.
Paasiuminarsaaniarluni inatsisartut peqqussutissaattut nutaatut siunnersuut saqqummiunneqarpoq peqqussutip atuuttup allannguutissaatut pinnani.
Allannguutit uani taaneqartut eqqaassanngikkaanni isumaginnittoqarfiup aqunneqarnera aaqqissuussaaneralu pillugit Inatsisartut peqqussutaannut nr. 9-imut, 30. oktober 1998-imeersumut atuuttumut naleqqiullugu allannguivinnissamik eqqarsaateqartoqanngilaq.
Makkua tusarniaavigineqarsimapput:
KANUKOKA kommuninut tusarniaanissamik qinnuigineqarluni
Sulinermik Inuussutissarsiuteqartut Kattuffiat
Isumaginninnermi Naammagitaalliuuteqartarfik
Aqutsinermut Pisortaqarfik
Aningaasaqarnermut Pisortaqarfik
Nunap Iluani Pissutsinut Allaffik
Nunap Immikkoortuini Allaffiit Ilulissani Qaqortumilu
Ulloq unnuarlu angerlarsimaffinnut Allaffik
Tusilartunut Siunnersuisoqarfik
Danmarkimi Allaffik isumaginninnermut immikkoortortaqarfik
Isumaginninnermi Naammagittaalliuuteqartarfiup allattoqarfia allannguutissatut siunnersuutinik saqqummiussisimavoq, siunnersuummullu sapinngisamik ilanngunneqarsimapput. Tamatuma saniatigut tusarniaanermut akissutit allannguinissamik pissutissaqalersitsisimanngillat.
Allaffissornikkut aningaasatigullu kingunerisassat
Siunnersuut Isumaginninnermi Naammagittaalliuuteqartarfimmut oqilisaanerup saniatigut allaffissornikkut kinguneqassangatinneqanngilaq.
Aatsaat pikkorissaanissanik neqerooruteqarnissamik aalajangiisoqarpat siunnersuut aningaasatigut kinguneqassangatinneqarpoq. Taamaattoqassappallu aningaasartuutissat 1 mill. koruunit missaanniissagatinneqarput. Pikkorissaanissat ukiut sisamakkaarlugit kommunalbestyrelsimut qiniisisoqareernerini neqeroorutigineqarsinnaapput. Pikkorissaanissat neqeroorutigineqarsinnaapput aatsaat tamatumunnga Aningaasanut Inatsimmi aningaasaliisoqarsimappat. Taamaattoqassappallu tamanna 2004-imi isummerfigineqassaaq.
Aalajangersakkanut ataasiakkaanut nassuiaatit
§ 1-imut
§ 1, imm. 1-imi aalajangersagaq peqqussummi atuuttumi § 1-mut assinguvoq.
Aalajangersagaq Naalakkersuisut isumaginnittoqarfimmik aqutsinissaannik aaqqissuussinissaannillu oqartussaaffiliivoq, kiisalu kommunit isumaginninnermi malittarisassanik malin-ninneranik nakkutilliisinnaatitaanerannillu imaqarpoq. Isumaginninnermi malittarisassat paasi-neqassapput ilaatigut tassaasutut inatsisitigut najoqqutassat assigiinngitsut. Taamaalillunilu tassa periusaasartut, inatsiseqarnermi ileqquusartut pisullu qanoq issusaa isumaginninnermi malittarisassanut ilaapput. Isumaginninnermut naalakkersuisoq nakkutilliinermut akisussaasuuvoq.
Nakkutilliinerup malitsigaa Naalakkersuisut isumaginninnermut tunngasunik kommunit sulianik suliarinnittarnerata pitsaassusaanik naliliisinnaammata. Assersuutigalugu kommunit nipangiussisussaatitaanerminnik, naammagittaalliornissamut ilitsersuisussaatitaanerminnik il.il. malinninnerannik naliliinerit pineqarput, imaluunniit kommunit missingiinerminni inatsisitigut eqqarsaatigisariaqartut tamaasa ilanngussimaneraat.
Assersuutigalugu Naalakkersuisut isumaqarpata kommuni soorlu isumaginninnermut tunngasunik isumaginninnermini sulianik suliarinnittarneq pillugu inatsisinik unioqqutitsisimasoq, pisut uparuarneqarsinnaapput kingornalu Kommunit Nakkutilliisoqarfiannut tunniunneqarsinnaallutik. Uparuaaneq taamaallaat innersuussutinik imaqarsinnaavoq, peqqussutaanngitsunik pineqaatissiissutaanngitsunillu. Nakkutilliineq aamma kommuninut killilimmik ilitsersuisussaatitaanermik malitseqarpoq. Taamaaliornikkut sulianik suliarinnittarnerup pitsaassusaa qaffatsinneqassaaq.
Imm. 2-imi piginnaatitsissummik aalajangersagaq nutaajuvoq pingaartumillu nakkutilliisut ulluunerani unnuaaneranilu paaqqinnittarfinnik nakkutilliinissaanni aalajangersaanissamut atorneqarnissaa naatsorsuutigineqarpoq. Naatsorsuutigineqarpoq nakkutilliisussat tassaassasut kommunip, ineqartut qanigisaasa peqqinnissaqarfiullu aallartitaat.
§ 2-mut
Aalajangersagaq peqqussummi atuuttumi § 2-mut assinguvoq, allannguuteqartitsisoqavinnissaalu eqqarsaatigineqanngilaq.
Naalakkersuisut kommunit sanaartornermut tunngasunik pilersaarusiaat pillugit paasissutissanik pissarsiniartassapput. Tamanna pisassaaq sanaartornikkut suliat Aningaasanut Inatsisikkut tapiiffigineqarnissaannik qinnutigineqartut tulleriiaarneqarnissaat siunertaralugu. Aalajangersakkakkut Naalakkersuisut tulleriiaarisussaatinneqarput.
Aalajangersakkakkut aalajangiunneqarpoq piorsaanissamik pilersaarutit ukiunut sisamanoortuussasut. Ukiut sisamat ukiumut aningaasanut inatsiseqarfiusumut ukiunullu missingersuusiorfiusunut tunngasuupput. Piorsaanissamik pilersaarutit suliarineqartussat tassaapput isumaginninnermut naalakkersuisoqarfiup Namminersornerullutik Oqartussat ukiunut sisamanut pingaarnerusutigut sanaartugassanut pilersaarutaanut ilanngussai. Sanaartornissamik pilersaarutit taakku sanaartornermut aningaasaliissutit pillugit siunnersuutinut tamarmiusunut tunngaviusarput, aningaasaliinissamik ukiumoortumik inatsisinut ilanngunneqartartut.
§ 3-mut
Aalajangersagaq peqqussummi atuuttumi § 3-mut assinguvoq, allannguuteqartitsisoqavinnissaalu eqqarsaatigineqanngilaq.
Aalajangersagaq Naalakkersuisut §§ 1 aamma 2-imi suliassarititaasut isumagineranni kommuninit paasissutissanik naleqquttunik pissarsiniarsinnaatitaanerannik imaqarpoq.
§ 4-mut
Aalajangersagaq peqqussummi atuuttumi § 4-mut assinguvoq, allannguuteqartitsisoqavinnissaalu eqqarsaatigineqanngilaq.
Aalajangersagaq taanna isumaginninnikkut sanaartukkanut erseqqinnerusumik malittarisassiornissamut pisussaaffiliivoq. Peqqussut atuuttoq naapertorlugu isumaginninnermi piorsaaneq pillugu kaajallaasitaq nr. 213 saqqummersinneqarsimavoq.
§ 5-imut
Aalajangersagaq nutaajuvoq. Kommunini ataatsimiititalianut ilaasortanik isumaginninnikkut suliaqartartunut pikkorissaanissamik Naalakkersuisut neqerooruteqarnissaannik periarfissiivoq. Ukiut sisamakkaarlugit kommunalbestyrelsimut nutaamik qinersisoqarneri tamaasa pikkorissartitsisoqarsinnaavoq. Pikkorissartitsinerit aatsaat pisinnaapput Aningaasaqarnermi Inatsimmi tamatumunnga aningaasanik immikkoortitsisoqarsimappat.
Kommunit ataatsimiititaliaasa isumaginninnikkut sulianik aalajangiisarneri nukittorsarniarlugit aalajangersagaq ilanngunneqarpoq.
§ 6-imut
Aalajangersagaq peqqussummi atuuttumi § 5-mut assinguvoq, allannguuteqartitsisoqavinnissaalu eqqarsaatigineqanngilaq.
Kommunip isumaginninnikkut ingerlatsinerata iluani pissutsini aalajangiisinnaatitaaneq inatsisit allat naapertorlugit oqartussaasuni allaniissinnaavoq.
Kommunip ileqqoreqqusaani kommunalbestyrelsip oqartussaasunik allanik aalajangiisinnaassusiliisinnaaneranik aalajangersagaq atuuttoq atorunnaarsinneqarpoq. Kommunip ileqqoreqqusaa oqartussaasunik kommunip avataaniittunik piginnaatitsinissamik tunngavigineqarsinnaan-ngitsoq innersuussutigineqarpoq. Kommunalbestyrelsip nunaqarfinni aqutsisut aalajangiisinnaassusilersinnaavai, takuuk kommunalbestyrelsit nunaqarfinnilu aqutsisut il.il. pillugit Inatsisartut inatsisaanni § 3.
§ 7-imut
Aalajangersagaq peqqussummi atuuttumi § 6-mut assinguvoq, allannguuteqartitsisoqavinnissaalu eqqarsaatigineqanngilaq.
Isumaginninnikkut piorsaanissamik pilersaarusiornermi kommunit suliassaat aalajangersakkakkut aalajangiunneqarput. Pilersaarutit ilassaattut kommunit siunnersuusiaat tamatuma kingorna nuna tamakkerlugu pilersaarusiornermi tunngavigineqassapput.
Naalakkersuisut kommunit piorsaanissamut siunnersuusiornerini suleriaasissat pillugit malittarisassiornissamut piginnaatinneqarput. Allaffissornikkut malittareqqusat taakku kommunit sulinerannik oqilisaassapput, aammalu Naalakkersuisut suliamik ingerlatitseqqinnerannut assigiiaanik tunngavissiissallutik.
§ 8-mut
Aalajangersagaq peqqussummi atuuttumi § 7-mut assinguvoq. Allannguuteqartitsisoqavinnissaa eqqarsaatigineqanngilaq. Paasiuminarsaaniarluni oqaatsitigut aaqqiisoqarpoq.
Siullertut aalajangersakkami aalajangerneqarpoq, kommuni aalajangiisimassasoq Isumaginninnermi Naammagittaalliuuteqartarfik naammagittaalliuummut isummertinnagu. Aappassaattut aalajangiineq isumaginninnermi malittarisassat malillugit pisimassaaq, pingajussaattullu suliamut attuumassuteqartoq Isumaginninnermi Naammagittaalliuuteqartarfimmut naammagittaalli-ornissaminut sapaatit akunnerinik sisamanik piffissaqarpoq.
Oqariaaseq suliamut attuumassuteqartoq paasineqassaaq nalinginnaasumik pisortat ingerlatsineranni inatsisini suliamut attuumassuteqartumik oqariaaseq naapertorlugu.
Aalajangersakkami erseqqissaatigineqarpoq kommunalbestyrelsip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaasoq, taamaalilluni nalornissutaasariaarutissalluni kommunalbestyrelsi sinnerlugu politikkikkut imaluunniit allaffissornikkut aalajangiisoqarsimappat Isumaginninnermi Naammagittaalliuuteqartarfimmut naammagittaalliortoqarsinnaasoq.
Assersuutigalugu taaneqarsinnaavoq nunaqarfimmi aqutsisut aalajangigaat inuup Isumaginninnermi Naammagittaalliuuteqartarfimmut toqqaannartumik naammagittaalliuutigisinnaammagu.
Isumaginninnermi malittarisassani ataasiakkaani aalajangersagaqaraluartoq, isumaginninnermut ataatsimiititaliaq imaluunniit isumaginninnermut ataatsimiititaliami siulittaasoq aalajangiissasoq, akisussaaffik tamatigut kommunalbestyrelsimiippoq. Taamaalilluni isumaginninnermi suliassamut aalajangiineq ataasiinnaq kommunimi pissaaq.
Innuttaasoq ersarissumik tunngavigisamik tusartinneqarsimanngippat aammalu naammagittaalliorsiinnaanermik siunnersorneqarsimanngippat, naammagittaalliornissamut piffissarititaasoq aatsaat atuutilissaaq ersarissumik tunngavigisamik tusartitsisoqareerpat aammalu naammagittaalliornissamik siunnersuisoqareerpat, tamatumani pisortat ingerlatsiviini suliassanik suliarinnittarneq pillugu Inatsisartut inatsisaanni allassimasutut.
Imm. 2-mi aalajangersagaq Naalakkersuisut aalajangigaannik naammagittaalliuuteqartarneq pillugu malittarisassanik imaqarpoq. Siullermik aalajangersarneqarpoq Isumaginninnermut Naammagittaalliuuteqartarfik naammagittaalliuummut isummertinnagu Naalakkersuisut aalajangiisimassasut. Aappassaattut aalajangiineq isumaginninnermi malittarisassat malillugit pisimassaaq; pingajussaattullu suliamut attuumassuteqartoq Isumaginninnermi Naammagittaalliuuteqartarfimmut naammagittaaliornissaminik sapaatit akunnerinik sisamanik piffissaqarpoq.
Peqqussutissatut siunnersuutip kinguneraa isumaginninnermi malittarisassani Naalakkersuisut allaffissornikkut inaarutaasumik aalajangiisussaanerat pillugu aalajangersakkat nassaassaajuassasut. Aalajangersagaq ilanngunneqarpoq innuttaasunut aalajangiinerit taamaattut naammagittaalliuutigineqarsinnaannginnerat erseqqissaatiginiarlugu. Aalajangiinerit taamaattut tassaasinnaapput: meeqqanik inuusuttunillu ikiorsiisarneq pillugu Inatsisartut peqqussutaat malillugu meeqqanik inuusuttunillu Kalaallit Nunaata avataanut inissiineq, kiisalu annertuumik innarluutillit ikiorserneqartarnerat pillugu Inatsisartut peqqussutaat malillugu tulleriiaarisarnermut ataatsimiititaliap aalajangigaanik naammagittaalliutiginninnerit.
Eqqartuussivimmi suliassat nalinginnaasumik suliassanngortitsivittut siullertut Illoqarfiit eqqartuussiviinut tunniunneqartarput. Imm. 3-mi aalajangersakkami aalajangersarneqarpoq suliassani taaneqartuni Nunatta eqqartuussiviata eqqartuussivittut suliassangortitsivittut siulliunerata, taamaammallu Østre Landsrettimik eqqartuussiviit suliassanngortitsiviusussat aapparigaat.
Aalajangersagaq pinngitsaaliilluni angerlarsimaffimmit peersitsisoqarnissaanik ingerlatsiviup aalajangiineranik suliamut attuumassutillit eqqartuussivimmut tunniussisinnaanerannik killiliinermik imaqarpoq. Killiliineq marlunngorlugu avitaavoq. Ilaatigut suliap Nunatta Eqqartuussivianut tunniunneqarnissaanut sapaatit akunnerinik sisamanik piffissaliussaqarpoq, ilaatigullu allaffissornikkut ingerlatitseqqiffissat atorneqaqqaassapput, imaalluni aatsaat ingerlatitseqqittoqarsinnaasoq Isumaginninnermi Naammagittaalliuuteqartarfik aalajangeereersimappat. Killiliineq Inatsisimmi tunngaviusumi § 63-imi eqqartuussivimmi aalajangiivigititsinissamut periarfissaqarluarneranut sanilliullugu isigineqassaaq.
Imm. 4-mi aalajangersagaq naammagittaalliornissamut piffissarititaasoq sapaatip akunnerinik sisamanik sivisussuseqartoq sivitsorneqarsinnaaneranik periarfissiivoq, piffissarititaasumik qaangiineq pissuteqarsimappat pineqartumut tutsinneqarsinnaanngitsunik. Uani eqqarsaatigineqarnerupput naammagittaalliortoq napparsimasimappat imaluunniit aallaqqasimappat.
Eqqqartuussisarneq pillugu inatsimmi § 3 unioqqutinniarneqanngilaq, taamaalilluni eqqartuussisut Nunatta eqqartuussiviani atorfeqartut aamma naammagittaalliornissamik piffissarititaasumik sivitsuisinnaapput.
§ 9-mut
Aalajangersagaq peqqussummi atuuttumi § 8-mut assinguvoq, allannguuteqartitsisoqavinnissaalu eqqarsaatigineqanngilaq.
Aalajangersagaq Isumaginninnermi Naammagittaalliuuteqartarfiup ilaasortassaanik toqqaasar-nermi malittarisassanik imaqarpoq. Naalakkersuisut Isumaginninnermi Naammagittaalliuuteqartarfiup ilaasortassaanik toqqaasassapput.
Isumaginninnermi Naammagittaalliuuteqartarfiup siulittaasua inatsisilerituutut soraarummeer-simasuusussaavoq imaluunnit allatigut Kalaallit Nunaanni inatsisinik isumaginninnermut tun-ngasunik sukumiisumik paasisimasaqassalluni. Siulittaasup atorfimmigut sumut attuumassuteqarnissaanik piumasaqaateqartoqanngilaq, inuulli illuinnaasiortuunngitsutut pituttorsimanngitsutullu isigineqarnissaa pingaarsorineqarpoq.
Tamatuma saniatigut Naalakkersuisut ilaasortat sinnerinik sisamanik toqqaassapput, taakkunannga marluk isumaginninnermi inatsisinik ilisimasaqassapput, marlullu isumaginninerup iluani inuiaqatigiit ingerlaasiannik ilisimasaqassallutik. Naalakkersuisut inunnik isumaginninnermi suliat suliarineqarnerini aalajangiivigineqarneriniluunniit peqataasartunik ilaasortassanik toqqaasinnaanngillat. Ilaasortat assersuutigalugu tassaasinnaapput kommunini inuiaqatigiinnit qinikkatut suliaqarsimasut, inuit isumaginninnerup iluani inuiaqatigiit ingerlaasiat aallaavigalugu annertuumik suliaqartut, isumaginninnermi inatsisit pillugit ilinniartitsisut, inuit kommunit pisortaqarfiillu avataanni isumaginninnermi inatsisinik suliaqartut, inuilluuniit isumaginninnermi suliat suliarineqarnerini aalajangiivigineqarneriniluunniit peqataasarsimasut.
Naalakkersuisut Isumaginninnermi Naammagittaalliuuteqartarfiup ilaasortaasa tallimaasut tamarmik sinniisussaannik toqqaassapput.
Isumaginninnermi Naammagittaalliuteqartarfiup ilaasortai ukiunut marlunnut atuuttumik toqqarneqartassapput. Ilaasortat arlaleriarlutik toqqarneqartarnissaannut aporfissaqanngilaq. Suliap ingerlaavartuunissaanit isigalugu tamanna naleqquttuusinnaavoq.
Imm. 2-mi aalajangersagaq Isumaginninnermi Naammagittaalliuteqartarfiup assersuutigalugu nakorsatut suliatigut siunnersortissarsiornissaanik periarfissiivoq. Tamanna pisariaqarsinnaavoq suliani nakorsat suliarisartagaannut paasiuminaatsunut tunngasunik imaqartuni.
§ 10-mut
Imm. 1-imi, 2-imi aamma 5-imi aalajangersagaq peqqussummi atuuttumi § 9, imm. 1-imut, 2-imut aamma 5-imut assinguvoq. Imm. 3-imi aamma 4-imi allannguisoqarpoq.
Isumaginninnermi Naammagittaalliuuteqartarfiup qaqugukkut aalajangiisinnaatitaaneranik imaqarpoq, aammalu qanoq aalajangeeriaaseqarnissaanik. Naammagittaalliuuteqartarfik aalajangiisinnaatitaasassaaq ilaasortat ikinnerpaamik pingasut najuukkaangata. Naammagittaalliuuteqartarfik amerlanerussuteqarnikkut aalajangiisassaaq, aammalu taasinerit amerlaqatigiitsillugit siulittaasup taasinera aalajangiisuusassaaq.
Aalajangersakkakkut aalajangerneqarpoq Naammagittaalliuuteqartarfiup aalajangikkani allaganngortassagai tunngavilersortassagaalu.
Aamma aalajangersarneqarpoq ataatsimeereernerit tamaasa aalajangiinerit tamanut tunngassuteqartut siulittaasup tamanut saqqummiuttassagai. Tamatuma malitsigisaanik tamanut saqqummiussinnginnermini siulittaasup inuit aqqi sumiiffiillu aqqi peertassavai aalajangiinerit kikkunnut tunngasuuneri ersigunnaarsillugit, isertuuttarialinnillu paasissutissaqarpat tamakku aamma ersissanngillat. Aalajangiineq tamanut tunngassuteqartarpoq suliassaqarfimmi aalajangersimasumi maleruagassaliortoqarneranik kinguneqaruni, Naalakkersuisut periusaannut ilitsersuutaannulluunniit akerliuguni, periusaasartumik nalinginnaasumik qulaajaasuuguni imaluunniit inuiaqatigiit allanngoriartornerat pissutigalugu Isumaginninnermi Naammagittaalliuuteqartarfiup siusinnerusukkut periuserisartagaanik allanngortitsiguni.
Aalajangiinerit minnerpaamik kommuninut, Kommunit Nakkutilliisoqarfiannut, Kommunit Kattuffiannut, Naalakkersuisunut, Naalagaaffiup Sinniisaanut, Inatsisartut Ombudsmand-ianut, Isumaginninnermi Siunnersortinngorniat Ilinniarfiannut Isumaginninnermilu Pisortat Peqatigiiffiannut nassiunneqassapput. Tamatuma saniatigut Isumaginninnermi Naammagit-taalliuuteqartarfiup Allattoqarfiata qinnuteqartoqarneratigut aalajangikkat tunniuttassavai.
Imm. 3-mi aalajangersakkap Isumaginninnermi Naammagittaalliuuteqartarfik sinnerlugu siulittaasup aalajangiisinnaanera periarfissippaa.
Tunngaviusoq illersorneqarsinnaasoq tassaasinnaavoq isumaginninnermi tunniunneqartartunik naatsorsuinermi taamaallaat akit tamanut saqqummiunneqarsimasut malillugit naatsorsorneqarsimappata, aammalu kommunimit naliliisimaneq pineqanngippat.
Tamanna peqqussummut atuuttumut naleqqiullugu allannguutaavoq, suliani ataasiakkaani a-ningaasat annikitsut pineqartillugit sulianilu ataasiakkaani naliliinertaqanngitsuni imaluunniit tunngaviusumik pingaaruteqanngitsuni siulittaasoq aalajangiisinnaalluni.
Siulittaasup illersorneqarsinnaasumik tunngavilimmik aalajangeereernermini ilaasortat sinneri aalajangiinermik ilisimatissavai. Tamanna peqqussummut atuuttumut naleqqiullugu allannguutaavoq, suliamut attuumassuteqartunut aalajangiineq nalunaarutigineqannginnerani siulittaasup ilaasortat sinnerinik aalajangiinerminik ilisimatitsinissaa aammalu minnerpaamik ilaasortat marluk sapaatip akunneri marluk qaangiutsinnagit piumasarippassuk aalajangiineq Naammagittaalliuuteqartarfimmut tamakkiisumut aalajangiiffigisassatut saqqummiunneqassasoq.
Allannguut imm. 4-mi aalajangersakkamut suliassat allakkatigut suliarineqarnissaannik naleqqussorineqartut ilaasortanut aalajangiinissamik inassuteqaatitalerlugit nassiunneqarnissaannik periarfissiisumut atatillugu isiginiarneqassaaq. Inatsisitigut illersorneqarnissaq eqqarsaatigalugu ilaasortaq kinaluunniit piumasaqarsinnaavoq, suliassaq ataatsimiinnermi oqaluuserineqassasoq. Suliassani ersarissuni aammalu suliassani suliamut attuumassuteqartoq eqqarsaatigalugu tuaviortumik aalajangiisoqartariaqartillugu aalajangersakkap atorneqarnerunissaa eqqarsaatigineqarpoq. Suliassat taakkuusinnaapput imm. 3-mi atuuttumi pineqartut.
Tassa imaappoq, peqqussummi atuuttumi § 9, imm. 3-imi suliassat pineqartut allatut immik-koortiterneqartut, imaalerluni suliassaqassasoq aalajangiiffiginissai nalorninanngitsunik; taakkua imm. 3-imut tunngapput. Suliassat allat allakkatigut suliarinissai naleqquttuusorinartut imm. 4-imut tunngapput. Taamaalilluni suliassat ersarinnerusumik immikkoortiterneqarsinnaalissapput. Tamanna Isumaginninnermi Naammagittaalliuuteqartarfiup allattoqarfiata suleriaasaani oqilisaataassagatinneqarpoq.
Kommunip aalajangiinini kingorna allanngortippagu, taamaalilluni naammagittaalliortoq tamakkiisumik taperserneqarluni, pissusissamisuussaaq naammagittaalliortoq aperissallugu naammagittaalliornini attatiinnarusunneraa.
Isumaginninnermi maleruagassat malillugit aalajangiisoqarsimannginnera pissutigalugu Isumaginninnermi Naammagittaalliuuteqartarfik aalajangiisinnaatitaatinnagu, suliassaq pisussamut oqartussaasumut sapinngisamik ingerlateqqinneqassaaq, tamanna pissaaq pisortat ingerlatsiviini suliassanik suliarinnittarneq pillugu Inatsisartut inatsisaanni allassimasutut.
Naammagittaalliuuteqartarfik ukiumoortumik nalunaaruteqartassaaq. Nalunaarut minnerpaamik aalajangiinernik tamanut tunngassuteqartunik imm. 2-imi pineqartunik imaqassaaq. Nalunaaruteqartarnerup qaammatisiutit ukiuat malippaat.
§ 11-mut
Aalajangersagaq nutaajuvoq. Taanna suliani aalajangiinissamik nalorninanngitsuni eqaanneru-sumik suleriaaseqarnissaq siunertaralugu Isumaginninnermi Naammagittaalliuteqartarfiup kissaateqarneratigut ilanngussaavoq.
§ 12-mut
Aalajangersagaq peqqussummi atuuttumi § 10-mut assinguvoq.
Tassuuna erseqqissarneqarpoq kommunit Nunattalu Karsia tassaasut isumaginninnermi tunniunneqartartunut aningaasalersuisut. Periaaserineqartarpoq suliassat nammagassallu agguataarneqarnissaat kiisalu akiliinermi il.il. malittarisassat pillugit Naalakkersuisut kommunillu Kattuffiata isumaqatigiinniartarneri. Taamatut periaaseqartarneq immikkut inatsimmi ilanngunniarneqarpoq, imaalillugu aningaasatigut agguaqatigiisitsineq inatsimmi namminermi ersittunngorlugu. Tamaaliornikkut allannguisoqassangaluarpat tassunga tunngassuteqartut tamaasa ilanngullugit sukumiinerusumik suliaqartoqarsinnaanera qulakkeerneqassammat.
§ 13-imut
Aalajangersagaq peqqussummi atuuttumi § 11-mut assinguvoq, allannguuteqartitsisoqavinnissaalu eqqarsaatigineqanngilaq. Oqaatsitigut aaqqiisoqarsimavoq.
Isumaginninnermi Naammagittaalliuuteqartarfiup qanoq aningaasalersorneqarnissaa aala-jangersakkami aalajangerneqarpoq. Inatsisartuni Naalakkersuisunilu ilaasortat akissar-siaqartinneqarnerat il.il. pillugu Inatsisartut inatsisaat naapertorlugu Isumaginninnermi Naammagittaalliuuteqartarfiup ilaasortai akissarsiaqartinneqassapput, ullormusiaqartinneqassallutik aammalu angalanermut ineqarnermullu aningaasartuutaat matussuserneqassallutik.
§ 14-imut
Aalajangersagaq peqqussummi atuuttumi § 12-mut assinguvoq, allannguuteqartitsisoqavinnissaalu eqqarsaatigineqanngilaq.
Aalajangersakkami aalajangerneqarpoq kinaluunniit isumaginninnermi suliat allaffissornikkut suliarineqarneranni aalajangiivigineqarneraniluunniit peqataasoq pisortanik sullissitilluni atorfeqartilluniluunniit pinerluuteqarneq pillugu pinerluttulerinermik inatsimmi malittarisassat malillugit akisussaaffeqartoq. Tamanna atuuppoq atorfik tamanit qinerneqarnikkut atorfigineqaraluarpalluunniit. Tassa imaappoq aalajangersakkami aamma pineqarput nunaqarfinni aqutsisunut, kommunalbestyrelsinut, ataatsimiititalianut ataatsimiittartuutitanut il.il. ilaasortat.
§ 15-imut
Aalajangersakkami aalajangerneqarput peqqussutip ulloq atuutilerfissaa aamma ikaarsaariar-nermi aalajangersakkat.
Ulloq atuutilerfissaatut 1. januar 2002 siunnersuutigineqarpoq.
Allaffissornikkut malittarisassaq peqqussutikkut matumuuna atuutiinnartussaq tassaavoq isumaginninnikkut piorsaaneq pillugu kaajallaasitaq nr. 213.
Peqqussut manna malillugu Naalakkersuisut Isumaginninnermi Naammagittaalliuuteqartarfiup ilaasortassaanik nutaanik toqqaanissaata tungaanut Isumaginninnermi Naammagittaalliuuteqartarfimmi ilaasortaasut suliaminnik ingerlatsiinnassapput. Tamanna ikaarsaariarfiup ingerlane-rani innuttaasut kommunillu isumaginninnermi ingerlatsiviit aalajangigaannik naammagit-taalliuutiginninnissaminnut periarfissaqarnissaannut pisariaqarpoq.